На ден 28 јуни 2024, во х. Оаза во Штип, ја одржавме тркалезната маса: „Зајакнување на работничките права на жените и борба против родовата дискриминација во приватниот сектор”.
На тркалезната маса, панелисти ни беа:
o Маја Цветановска Андонов, претставничка од Државниот трудов инспекторат;
o Игор Јадровски, како претставник од Комисија за спречување и заштита од дискриминација;
o Валентина Дисоска, претставничка од Националната платформа за жени претприемачи, (National Platform for Women Entrepreneurship).
Модераторка на дискусијата ни беше: Љупка Трајановска од Center for Research and Policy Making.
Додека пак, како дискутантка се вклучи и претседателката на Гласен Текстилец, Кристина Ампева.
За време на дискусијата со претставничката од Државниот инспекторат за труд ги поразговаравме темите поврзани со: стандардните процедури при случаи на родово-базирана дискриминација, како се идентификуваат и како се постапува во истите случаи. Понатаму, колку се чести и како да се пријават, разговаравме за постапувањето на ДИТ во случаи на дискриминација на бремени жени на кои не им се обновуваат договорите, кои мерки се преземаат во тој случај. За крај претставничката Маја Цветановска Андонов, ја истакна соработката на Државниот трудов инспекторат со останатите институции, како и со граѓанските организации и заеднички случаи кои биле регистрирани и застапувани. Истата ги истакна потребите од подобро прецизирање на Законот за работни односи за системска заштита на бремените жени – работнички, кои имаат договори на определено работно време.
Со Игор Јадровски, претставникот од Комисијата за спречување и заштита од дискриминација, поразговаравме за најчестите форми на родова дискриминација пријавени во приватниот сектор, механизмите кои се достапни за да се одговори на дискриминацијата врз бремените жени со краткорочни договори и колку истите се ефикасни.Исто истакната беше важната работа на Комисијата во полето на подигање на свеста и обезбедување на обуки за родова дискриминација на работното место и соработката со останатите институции и граѓански организации.
Претставничката на Бизнис организацијата на жени претприемачи, Валентина Дисоска, ги истакна предизвиците со кои се соочуваат жените претприемачи, сподели најдобри практики и успешни стратегии имплементирани од бизниси предводени од жени за промовирање на родовата еднаквост и правата на жените на пазарот на трудот.
Кристина Ампева, од Гласен текстилец, ја истакна значајната соработка со институциите кои беа дел од тркалезната маса и виталноста за нејзиното продолжување. Го истакна проблемот со договорите на определено работно време, односно кога работодавачот дознава дека работничката е бремена, често се стреми да не го продолжи нејзиниот договор и тоа нашиот Закон го дозволува тоа. Дополнително, многу работнички се искористуваат со прекувремено работно време, работа на празник и работа во недела, а тоа не се одразува во нивните исплатни листи.
Заеднички донесовме заклучоци, кои ќе ги преточиме во краток документ и ќе ги користиме за застапување кај надлежните институции, како и за измена на закони, во интерес на работничките од приватниот сектор.
Оваа активност е дел од проектот „Институционално и економско зајакнување на жените и девојките од источниот регион“, којшто го имплементира здружението за заштита на работничките права Гласен Текстилец – Штип.
Проектот е финансиски поддржан од The Kvinna till Kvinna Foundation и Шведска. Содржината на оваа објава е единствена одговорност на Гласен Текстилец – Штип.
