Познавањето на работничките права е еден од најважните предуслови за нивна навремена и ефикасна заштита, публикација наменета за врснички едукатори во Гласен Текстилец.
Публикацијата „Ги знам своите работнички права, ја знам својата моќ“, издадена од Здружението за заштита на работнички права „Гласен Текстилец“ – Штип, претставува практичен и разбирлив водич низ основните права кои произлегуваат од работниот однос.
Во публикацијата се обработуваат повеќе теми со кои работниците секојдневно се среќаваат, меѓу кои:
- засновање работен однос и договор за вработување;
- работно време и прекувремена работа;
- паузи, дневен и неделен одмор;
- годишен одмор и отсуства од работа;
- плата и додатоци на плата;
- отказ и отказни рокови;
- постапување во случај на повреда на работничките права;
- препознавање, последици и заштита од мобинг на работното место.
Посебно внимание е посветено на психичкото вознемирување – мобингот, начините на негово препознавање и механизмите кои им стојат на располагање на работниците за заштита на своето достоинство и права.
Целта на публикацијата е правните информации да им бидат достапни на учениците и врсничките едукатори.
Публикацијата е изработена во рамки на проектот „Организирани граѓани за организирана иднина“, имплементиран од „Гласен Текстилец“, со финансиска поддршка од Olof Palme International Center и Шведска.
