Текстилијада: култура што не молчи.

„Текстилијада 2025“ беше деветтото издание на фестивалот посветен на работничките права, културата, активизмот и граѓанскиот дијалог. Главна тема беше борбата против корупцијата и нејзините последици врз правдата, институционалната заштита и достоинството на работниците.

Преку јавни дебати, културни настани и креативен активизам, фестивалот ги охрабри граѓаните, младите и работничките да го прекинат молчењето и активно да се спротивстават на неправдата.

„Текстилијада 8“ се одржа под мотото „Различни насоки, иста цел“. Изданието ги истакна различните пристапи на здруженијата, синдикатите, институциите, работодавачите и одговорните брендови во борбата за подобри работнички права и услови за работа.

Преку дебати, културни настани и успешни примери за соработка, фестивалот поттикна отворен социјален дијалог и заедничко дејствување за поправедно и поинклузивно општество.

Важно: Локациите за сите активности се наведени во програмата.

„Текстилијада 7“, одржана во 2023 година под мотото „Текстилна правда – размислување за минатото, замислувајќи ја иднината“, ги поврза текстилното наследство на Штип, работничката правда и потребата од модернизација на индустријата.

Преку дебати, меѓународни форуми и културни настани беа отворени теми за дискриминацијата, одржливата мода, синдикалното организирање, судството и пристапот на работниците до правда.

„Текстилијада 6“ се одржа во 2022 година под мотото „Плата за живот – СЕГА И ВЕДНАШ!“, во период кога работниците се соочуваа со растечки животни трошоци, економска и енергетска криза.

Настанот ја истакна потребата од плата која овозможува достоинствен живот, почитување на работничките права и посилен социјален дијалог меѓу работниците, институциите, синдикатите и работодавачите.

Петтото издание на „Текстилијада“ се одржа во 2021 година под мотото „Известувањето и улогите во борбата за работнички права“.

Во фокусот беа улогата на медиумите, модните брендови, институциите и работничките организации во заштитата на работниците. Програмата вклучи дебати, уметнички настани, литературен конкурс и разговори за последиците од ковид-кризата.

„Текстилијада 4“ се одржа во 2020 година под мотото „Работнички права во време на Корона – Корона права“.

Изданието беше посветено на заштитата на текстилните работници за време на пандемијата, дискриминацијата, правното зајакнување, синдикалното организирање и потребата од солидарен одговор на здравствената, економската и социјалната криза.

Третото издание на „Текстилијада“ се одржа во 2019 година под мотото „Позитивни примери од регионот – синдикати, организации и институции здружени за подобри работнички права“.

Преку регионални дебати, уметнички инсталации, изложби, филмови и работилници беа претставени примери за соработка, синдикално организирање и заедничко дејствување за подобра заштита на работниците.

„Текстилијада 2“ се одржа во 2018 година под мотото „Преку културата и уметноста до социјален дијалог“.

Настанот ги отвори прашањата за иселувањето на младите, недостатокот од работна сила, социјалното претприемништво и иднината на Штип како текстилен град. Дебатите беа дополнети со изложби, филмски проекции, литературни средби и младински активности.

Првата „Текстилијада“ се одржа во Штип во 2017 година под мотото „Култура за, култура со, култура од текстилните работници“.

Преку дебати, поезија, филм, изложби и театар, работничките приказни беа поставени во центарот на јавниот простор. Настанот ги отвори темите за синдикалното организирање, правното зајакнување и заедничката борба за подобра иднина на текстилните работници.